సాగిపో.. సాగిపో..అనుకున్నది అందుకో..

సాగిపో.. సాగిపో..అనుకున్నది అందుకో..

అడుగులో అడుగు వేసుకుంటూ అందుకో

అడ్డు గోడల పునాదులు పెకలిస్తూ కదిలిపో

భగభగలాడే అగ్నిలా ఆత్మస్థైర్యంతో రగిలిపో  

క్షణ క్షణం కణ కణం లక్ష్యం వైపు మార్చుకో

ఎంతఎత్తయినా రావాలి కదిలేవాని కాళ్లక్రిందే

చేసిందే చేస్తూ పోతే అనుకున్నది చేర లేవు 

నీ మీద నీకు అనుమానమే ఆగర్భ శత్రువు

విలాసాలలో మునిగితే లక్ష్యాలను గెలవలేవు

కలిసి వచ్చే కాలం ఎదురు చూపులతో రాదు

ఓర్పు నేర్పు కూర్పుతో చరిత్ర సృష్టించ గలవు

మనసుతో ముందడుగువేస్తే సాధన సులువు

సరి కొత్త ఆలోచనలే నూతన శకానికి నాంది

నిజాయితి నమ్మకం కృషి విశ్లేషణ ఇంధనాలు

కారణాలు చెప్పటం ఆపి కార్యదీక్ష బద్దుడవు

ఆత్మ న్యూనత వదిలి అహర్నిశలు శ్రమించు

సంశయాలుమాని లక్ష్యాన్ని ఉడుములా పట్టు

నిరాసక్తత నేలరాచి విశ్వ నాయకునిగా మారు

సాగిపో.. సాగిపో..అనుకున్నది అందుకో..

అడుగులో అడుగు వేసుకుంటూ అందుకో

     - ప్రభాకర రావు కోటపాటి

            9 ఏప్రిల్ 2022

పరమాత్మ అనుసంధానమే ఆత్మసాక్షాత్కారం

వికసించిన పుష్పాలను చూసి  విప్పారతాయా నీ కనులు?

ఉదయించే ఉదయభానుని వీక్షించి 

ఉరకలేస్తుందా నీ ఉత్సాహం?

మట్టిని చీల్చుకొని పైకిలేచే మొలకను చూసి

ఉప్పొంగుతుందా నీ హృదయం?

పసి పిల్లల చిల్లర ఆటలు గమనించి

చిరునవ్వు చిందుతుందా నీ మోములో?

అసలైన ఆనందాన్ని గుర్తించారని అర్దం..

ఆనందానికి అవసరం .. ఆత్మ సంతృప్తి

మనశ్శాంతికి అవసరం.. స్పందించే గుణం

పరిపూర్ణతకు అవసరం..నిజాన్ని గుర్తించే శక్తి

జీవితానికి అవసరం.ప్రకృతితో సహప్రయాణం

విచ్చలవిడితనంతో వచ్చేది వికృత వికారం

విశృంఖల అలవాట్లు చేర్చేది అథఃపాతాళం

అధర్మ అనువర్తన నడిపించేది నరకప్రయాణం

అసత్య భాషతో అందేది అవమానాల కిరీటం

సృష్టి నియమాల పాలన యే పరమ సోపానం

సకల జీవులతో అనుబంధమే ఆనందగమనం

అజాత శతృవుగా జీవితమే దివ్య అలంకారం

పరమాత్మ అనుసంధానమే ఆత్మసాక్షాత్కారం

        - ప్రభాకర రావు కోటపాటి

                  05 మార్చి 2022

క్షణక్షణం జనుల హిత వర్తనమే జీవన సాఫల్యం

మారిపోతున్న పాత పద్దతిని మార్చుకో

చేసే పని మీద శ్రద్దతో శిఖరాగ్రాన్ని చేరుకో

నీ తెలివి తేటలను తరచి తరచి తెలుసుకో

సాధించి నిలిచిన విజేతలతో స్నేహం పెంచుకో 

పెద్దపెద్ద కలలుకను అడుగు అడుగుగా అందుకో

ఎలా జన్మించావుకంటే ఎలా జీవించావో ముఖ్యం

ఎంతటి నిష్టూరమైనా నిజాన్ని పలకటం ముఖ్యం

ఏదైనా సాధించాలి అంటే నిరంతర కృషి ముఖ్యం

ఎల్లలులేని ఆనందానికి సుజనులస్నేహంముఖ్యం

వేల వేల వాగ్దానాల కన్నా చిన్న ఆచరణ ముఖ్యం

నీ శక్తియుక్తుల ఆత్మ పరిశీలన గెలుపుకు శ్రీకారం

నీ పరిశోధన సృజన స్పూర్తి  అభివృద్ధికి మూలం

నీతో పని చేసే వారి గెలుపు నీ గెలుపుకు ఆధారం

నీ పోరాటపటిమ చిత్తశుద్ది అందిస్తుంది విజయం

కణ కణం రణ ఉత్తేజం రగలటమే కర్మ యోగం

తప్పు సహజం కానీ మరలాచేయటం మూర్ఖత్వం

క్రిందపడ్డా బంతిలా ఎగరటం అత్యంత ఆవస్యకం

నమ్మిన నిజం కోసం ఒంటరిగా సాగించు గమనం

అవదులను కూల్చి కదలటమే శాశ్వతపరిష్కారం

క్షణక్షణం జనుల హిత వర్తనమే జీవన సాఫల్యం

        - ప్రభాకర రావు కోటపాటి

               5 డిసెంబరు 2021

చీకటిని చీల్చుకుంటూ ముందుకు సాగే..ఆ సూర్య కిరణం నీవు

చీకటిని చీల్చుకుంటూ ముందుకు సాగే..

ఆ సూర్య కిరణం నీవు

మట్టి పెళ్ళలను పెకలించుకుంటూ పైకిలేచే..

ఆ చెట్టు మొలకవు నీవు

బండ రాల్లను  దొర్లించుకొంటూ క్రిందకు దూకే..

ఆ జలపాతం నీవు

కారు మేఘాలను దశదిశలకూ చేరవేసే..

ఆ ఉప్పెన లాంటి వాయువు నీవు

నీకు ఆటంకం అదొక అనుభవం..

నీ సంకల్పం అదొక శిలాశాసనం..

నీ కర్తవ్యం  నిన్ను నడిపే ఇంధనం..

నీ సహనం నీకొక ఆయుధం.

వ్యసనాలను వదిలి పరిశోధన సాగించావా..

సాధించలేనిది లేదు.

నిరాశను విసర్జించి నైపుణ్యాలను పెంచావా..

సంపాదనకు కొరత లేదు.

సోమరితనాన్ని అనిచి స్వయంకృషిని నమ్మావా..

దరిద్రం దరికి చేరదు..

భయాన్ని పారద్రోలి విశ్లేషణా దృష్టితో చూసావా..

చీకు చింతా నీ చేరువ కాలేవు..

ఈజీవితం ఒకఅద్బుతం.అన్నిదిశలా అవకాశాలు

నీవు చూసే విధానం..నీకు కనపడే దృశ్యాలు 

నీవు గడిపే  క్షణ క్షణం..నీకు దేవుడిచ్చిన వజ్రాలు

నీ ఆసక్తి సాహసం సహనం నీ ప్రగతి సోపానాలు

     - ప్రభాకర రావు కోటపాటి

          18 డిసెంబరు 2021

సువిశాల ప్రపంచం..సమస్య ఎంత పెద్దది అయినా దొరుకుతుంది సమాధానం.

సువిశాల ప్రపంచం..సమస్య ఎంత పెద్దది అయినా దొరుకుతుంది సమాధానం.

కొండలు గుట్టలు నదులు వృక్షాలు.. అన్నీ మనకు అండగా ఉండే ఆత్మబందువులు.

పక్షులు జంతువులు జీవరాశులు..ప్రతిక్షణం నీకు తోడుగా సంగతులు చెప్పే స్నేహితులు.

అది జరగలేదు..అలా ఎందుకు జరిగింది. ఆ అలోచలనలే..అంతులేని ఆవేదనకు మూలం.

ఆవేదన ముదిరితే.. మారేను అసంతృప్తిగా..

తరువాత అదే నిరాశ పాతాలానికి పునాది.

వంద దారులు మూసుకు పోయినా.. నీకోసం

మరొక దారి.. వెదికితే నీ ముందే ప్రత్యక్షం.

నిరంతర అన్వేషణ.. నిత్యనూతన జీవిత రహస్యం..ప్రకృతి అతి పెద్ద ఆనంద భాండారం.

ఒంటరిగా జన్మించిన నీకు..అనంతవిశ్వం నీ సొంతం..ఆస్తులకన్నా విలువైనది నీ  ఆత్మవిశ్వాసం.

           - ప్రభాకర రావు కోటపాటి

              19 - జూన్ - 2021

జీవిత రసానుభూతిని..ఆఖరిశ్వాస వరకు అనుభవించు

ఆరాటం ఆత్రం అంతు లేని వ్యామోహం

ఎంత ఉన్నా ఇంకా ఇంకా కావాలనే పరుగు

ఆ పరుగులోనే జీవితసమయం కనుమరుగు

ఆశ ఆకాశమంత.నైపుణ్యంమాత్రంనలుసంత 

దనంకావాలి ఆస్తులుకావాలి కోరికలుకావాలి 

కానీ ఆ పరుగులో ఆనందాన్ని కాపాడుకోవాలి

సాధించాలికృషిచేయాలి ఆస్వాదిస్తూ సాగాలి

నీ అభివృద్దిలో ఇతరులకు చోటిస్తూ ఎదగాలి

ఏంతో అందమైనది లోకం.. 

కలలు కనే కనులకు మాత్రమే అది సొంతం

ఎక్కడో లేదు స్వర్గం..

మన మంచిని కోరుకొనే మనుషులతో సాద్యం

అంగడిలో దొరికేది కాదు ఆనందం..

మనస్సుమెచ్చే చిన్నచిన్న పనులతో ప్రత్యక్షం

పేచీలు ఎక్కడినుండో పుట్టవు..

మనఅపార్దాలతోనే పడుతుంది వాటిపునాది 

లేని వాటి గురించి ఆలోచిస్తూ..

ఉన్న వాటి ఉపయోగాన్ని వదిలివేయద్దు 

ముక్కోటి దేవుళ్లకు మొక్కుతూ..

దేవుడిచ్చిన మేధోశక్తి వాడకం మరచిపోవద్దు

అనవసరమైన అడ్డగీతలు గీసుకొని..

నా తలరాత అని జాతకాన్ని నిందించవద్దు 

అనుక్షణం అనురక్తితో ఆసక్తిగా గడుపుతూ..

జీవిత రసానుభూతిని..

ఆఖరిశ్వాస వరకు అనుభవించు 

         - ప్రభాకర రావు కోటపాటి

              20 - మార్చి- 2021

 

తెలుగు తెలుగు తేనెలు నిండిన తెలుగు

పదం పదం లో మధురం

స్వరం స్వరం లో అనురాగం 

గుండె లోతుల్లో నుండి ఉప్పొంగే జలపాతం 

వినేకొద్దీ వినాలనిపించే సుస్వరాల సంగీతం 

సందర్బానికి సరిపడే అనంత పద సంపద

నవరసాలను ఒలికించే రస ప్రవాహ ఝరి 

వినయ విధేయత నిండిన అమృత విరిజల్లు 

అమ్మనాన్న గురువు నేర్పిన ఆదిపలుకులు 

కధనంలో కదం తొక్కే పదునైన భావజాలం

పద్యంలోవిద్వత్తుతో నిత్యనూతనభాండారం

విప్లవ కవిత్వంలో నిప్పులుచెరిగే అఙిగుండం 

స్తుతి స్తోత్రంలో ఉప్పొంగే అలంకార శాస్త్రం 

  

మన మాతృభాష అనంతసంపదను గుర్తిద్దాం

అద్భుత పదపుష్పసువాసనను ఆస్వాదిద్దాం

మనస్సుఉల్లాసంతో నీంపే వెన్నెల్లో విహరిద్దాం

లెస్స అయిన తెలుగు వెలుగులో..

కరిగిపోని కాంతిలో విహరిద్దాం 

- ప్రభాకర రావు కోటపాటి

      21 ఫిబ్రవరి 2021