ఇదే నిజమైన కాల జ్ఞానం.... అదే మన పుట్టుకకు అసలైన కారణం....

తరిగి పోయేది నీ జీవితం 

పరిమితమైనది ఈ భూమి పైన నీ సమయం

నీవు ఆపలేనిది ఆ కాల గమనం 

కాలాన్ని కొనాలని చూసావా భంగపడతావు 

ఆ ఉరవడిని ఆపాలని ప్రయత్నించావా ఆబాసు పాలవుతావు 

దానిపై పెత్తనం చెలాయించాలని తలచావా ఆవిరై పోతావు 

విజ్ఞత తో నీవు చేయ గలిగింది తెలుసుకో

రోజు రోజుకూ నీ పరిణత పెంచుకో 

ప్రతి క్షణాన్ని స్నేహ పరిమళం తో నింపుకో 

ఆ గమనం లో ఆనందాన్ని ఆస్వాదించు 

ఆ పయనం లో మంచిని పెంచి పోషించు 

నీ బుద్దిబలముతో సమస్యలకు పరిష్కారం చూపించు 

నిన్ను నడిపించాలి నిర్మాణాత్మకమైన ఆలోచనలు 

నిన్ను కదిలించాలి నీ తోటి వారి అభిమాన కుసుమాలు 

నీ జన్మకు అర్దము కల్పించాలి నీవలన నెరవేరిన కార్యక్రమాలు 

ఇదే నిజమైన కాల జ్ఞానం.... 

అదే మన పుట్టుకకు అసలైన కారణం....  

జీవించటం అంటే తినటం, తాగటం, తిరగటం అని చెప్పారు కొందరు

జీవించటం అంటే తినటం, తాగటం, తిరగటం అని చెప్పారు కొందరు..

ఆనందించటం అంటే విచ్చలవిడితనం, పెత్తనం చేయటం, ఆస్తులు సంపాదించటం అన్నారు కొందరు.. 

పైకి ఎదగటం అంటే అధికారాన్ని సాధించటం, ఎలాగైనా విజయం పొందటం, అందరూ మనచుట్టూ తిరగటం  అని బదిలిచ్చారు ఇంకొందరు.....

నీవు పోయినా మిగిలి ఉండే పనులు చేయటమే జీవించటం అని నేర్పింది నా జీవితం...

క్రమ శిక్షణ, బాద్యతాయుత ప్రవర్తన, అందరిని కలుపుకొని నడవటం, మన మంచికోసం ఎదురుచూసే మనుషులే ఆనందం అని తెలియచేసింది నా అనుభవం...

నీవు పరిష్కరించిన సమస్యలు, నీవలన జరిగిన అభివృద్ధి, ఇంకా ఇంకా చేయాలి అనే తపనే నీ ఎదుగుదలకు కొలమానం అని వివరించింది నా విచక్షణా జ్ఞానం..  

మనుషులంతా ఒక్కటే అని మన సృష్టికర్త ఒక్కరే అని నీకు అనిపించటం లేదా

కులాల కుమ్ములాటలో నీవూ ఒక ఖడ్గంగా మారావా 
మానవత్వంలేని మత మౌడ్యంలో నీవూ ఒక మారణాయుధం గా మారావా 
జబ్బులాంటి జాత్యహంకారానికి నీవూ ఒక జన్మ ఖైదీ గా మారావా 
నీకు తెలియకుండా నీలో చేరిన ఆ భూతాలను గమనించ లేవా 
మనుషులంతా ఒక్కటే అని మన సృష్టికర్త ఒక్కరే అని నీకు అనిపించటం లేదా 
ఎన్ని తెలుసుకున్నా ఎంత చదువుకున్నా నీకు ఈ నిజం జీర్ణం కావటం లేదా  

నీ దేశం అక్రోసిస్తుంది నీ సేవ కోసం..నీ మాతృభూమి తీర్చమంటుంది నీ ఋణం..

అణువణువునా అలసత్వం

అడుగడుగునా అవినీతి 

అడిగేవారు లేరనే అహంకారం 

డబ్బు పెట్టి ఓట్లు కొనే అవకాశం

అన్నీ కలిస్తే రాజకీయం 

కులం చూసి ఓటు వేస్తాం 

మతమే మనకు ముఖ్యం 

మందు ఇస్తేనే పోలింగ్ కి వెళతాం

ధనం కోసం దేశాన్ని అమ్ముతాం

కానీ కావాలి మనకు మంచి నాయకత్వం 

గుంటలు పడిన రోడ్లు చూస్తే మనకు రోత 

కల్తీ కలిసిన సరుకులు చూస్తే మనకు కోపం 

కరెంటు కోత భరించలేక భగ భగ మంటలు 

త్రాగటానికి నీరు లేక ఎండిపోయే గొంతులు 

వీటన్నిటికి ఎవరో కారణం అనుకొనే అజ్ఞానం 

పై పై మాటలు నమ్ముతాం 

పుకార్లే మనకు ఆహారం

లేదు విశ్లేషించి అర్ధం చేసుకొనే సమయం

ఇవ్వము మంచివాళ్ళకు అవకాశం

మన బలహీనతలతో స్వార్ద నాయకుల వీర విహారం 

ఎవరో మారాలని ఎదురుచూస్తాం 

సైనిక ప్రబుత్వం తో మార్పు వస్తుందంటాం

ఈ దేశాన్ని ఎవరూ మార్చలేరని జోస్యం

మా అన్న తిన్నా చేస్తాడు అనే మొండి వాదం

మారాల్సింది మనమే అనేది మాత్రం గుర్తించం 

దేశం ఏమైపోయినా, నాకు నా ఆనందమే లోకం 

గ్రామాలు మండిపోతున్నా, నాకు నా విందు వినోదాలు అవసరం 

ఈ సంఘాన్నిమార్చగల సత్తా ఉన్నా, నా అలవాట్లు నా ప్రాణం 

నాకు నా కుటుంబం ముఖ్యం, నా బందువులు ముఖ్యం, స్నేహాలు ముఖ్యం, టి వి ప్రోగ్రాములు ముఖ్యం, చాటింగ్ ముఖ్యం, మేసేజులు ముఖ్యం, గుసగుసలు ముఖ్యం.

రోము నగరం తగలబడుతుంటే నీరు చక్రవర్తి పిడేలు వాయిద్యం

నీ దేశం అక్రోసిస్తుంది నీ సేవ కోసం....

నీ మాతృభూమి తీర్చమంటుంది నీ ఋణం..

కనులుంటే గమనిస్తావు

చెవులుంటే వింటావు 

చేతులుంటే నిరూపిస్తావు 

మనసుంటే విశ్లేషిస్తావు 

విశ్వాసముంటే నీ తోటి పౌరులను చైతన్య పరుస్తావు 

నీ ఓటు హక్కుని మంచి నాయకుని గెలిపించటానికి ఉపయోగిస్తావు  

మనిషివైతే నీ దేశం కోసం నీ ధన మనః ప్రాణాలను వెచ్చిస్తావు

నీ దేశం అక్రోసిస్తుంది నీ సేవ కోసం..
నీ మాతృభూమి తీర్చమంటుంది నీ ఋణం..

                                                                                                                                                 --ప్రభాకర రావు కోటపాటి

అందుకే ఈ సమాజం నీకోసం ఎదురు చూసేలా నీవు ఎదగాలి

రాళ్ళతో కొడితే పారి పోయెను ఒకడు

ఆ రాళ్ళనే ఏరి దుర్గాన్ని కట్టె నొకడు

రాళ్ళతో కొడితే పారిపోయేవాడు పిరికివాడు

ఎదురు తిరిగే వాడు మొండివాడు

ఆ రాళ్ళనే ఏరి విజయం అనే దుర్గాన్ని కట్టేవాడు నిజమైన నాయకుడు

ఇతరులను దోచుకొని సంపాదించటం రాక్షస తత్వం

తనచుట్టూ గిరిగీసుకొని బ్రతకటం స్వార్ద తత్వం

తనివ్వ గలిగినది పంచుకొని జీవించటం మానవత్వం

సేవా తత్వాన్ని నింపుకొని అందరినీ ఆదుకోవటం దైవత్వం

మానవత్వం దైవత్వం కలిసి ఉండటమే నాయకత్వం

నిద్రలో వచ్చే కలలకు తృప్తి పడేవాడు నిద్ర బోతు

పగటి కలలతో కాలక్షేపం చేసేవాడు సోమరిపోతు

కలలను కర్తవ్యాలుగా మార్చుకొనేవాడు కాల జ్ఞాని

కలలకోసం నిద్రనే త్యాగం చేసేవాడు మార్పు ప్రతినిధి

కర్తవ్యాన్ని మంచి మార్పుకోసం కొనసాగించేవాడు సంఘ సంస్కర్త

నీవు ఉన్నతంగా ఎదగటానికి నీకు ఈ సమాజం కావాలి

నీవు ఎదిగిన తరువాత ఈ సమాజానికి నీవు కావాలి

నీ ముందుతరాలకు నీవు మంచి సమాజాన్ని అందించాలి

నీవు పోయినతరువాత కూడా ఈ సమాజం నిన్ను గుర్తుంచుకోవాలి

అందుకే ఈ సమాజం నీకోసం ఎదురు చూసేలా నీవు ఎదగాలి

 

---- ప్రొ. వంగపల్లి విశ్వనాధం మరియు శ్రీ. సయ్యద్ రఫీ గార్ల ఉపన్యాస స్పూర్తి తో...

చేదు సత్యం మింగ గలిగితే జీవితం వైద్యాలయం..అడుగు తప్పక ఆడ గలిగితే అవనియే నృత్యాలయం

నింగిలోతును చూడ గోరితే నీటి చుక్కను కలుసుకో
రత్నతత్వం చూడ గోరితే రాతి ముక్కను కలుసుకో
అణువు నడిగితే తెలియదా బ్రహ్మాండమంటే ఏమిటో
మౌన శిల్పం చూడగోరితే మంచుగడ్డను కలుసుకో
మనిషి మూలం చూడ గోరితే మట్టిగడ్డను కలుసుకో

సముద్రానికి చమురు పూస్తే జిడ్డు పడుతుందా
హిమనగానికి బొగ్గు పూస్తే నల్లబడుతుందా
తలుపులు కిటికీలు ఎంతగా మూసుకొని ఉన్నా..
తరుముకొచ్చే కాలవాహిని తిరిగిపోతుందా
ముసురుకోచ్చే ముదిమి తన వల విసరకుంటుందా

ఎక్కడో అందనిది ఉందని అపేక్షించకు మిత్రమా
ఎదట ఉన్నది నీది కాదని ఉపేక్షించకు నేత్రమా
చిన్న దీపం మేలుకాదా చీకటింట్లో గడపగా
రాని దానికి అనుక్షణము నిరీక్షించకు హృదయమా
రాయినైనా మాటి మాటికి పరీక్షించకు దైవమా

రాలిపోయే ఆకులను ఎవరాపినా ఏముందిలే
ఊడిపోయే జుట్టును ఎంతగా వత్తినా ఏముందిలే
వప్పకున్నా కొన్ని మార్పులు తప్పవేమో ప్రకృతిలో
కరిగిపోయే మంచునెంతగా కప్పినా ఏముందిలే
కరిగిపోయే వయసునెంతగా దాచినా ఏముందిలే

చేదు సత్యం మింగ గలిగితే జీవితం వైద్యాలయం
మనసుపుటలను చదవ గలిగితే అనుభవం విద్యాలయం
ఎవ్వరో నేర్పాలనే బ్రమ ఎందుకంట వృధా.... వృధా..
అడుగు తప్పక ఆడ గలిగితే అవనియే నృత్యాలయం
కనులు తిప్పక చూడగలిగితే అణువణువు తత్వాలయం

పంటలెన్నో ఇంట ఉన్నా పరిగలేరిస్తుంది లోభం
పెట్టె లోపల గవ్వ ఏదని చెత్త వెతికిస్తుంది లోభం
లోభ తత్త్వం అంతు పట్టదు లోని పొరలను చీల్చకుంటే
ఉన్న కాస్తా కలత నిదురను ఊడ్చిపారేస్తుంది లోభం
మనిషి మనసును కాటి దిబ్బగా మాడ్చి మసి చేస్తుంది లోభం

                                            ----డా. సి. నారాయణ రెడ్డి

నిజాయితీకి కట్టుబడక ప్రజలను ఎలా పాలిస్తావు

చేతకాని తనముంటే జాతకాన్ని నిందించకు

నమ్మలేని సరుకుంటే అమ్మకాన్ని నిందించకు

ఎందుకైనా మేలు లోపమెక్కడుందో తెలుసుకొంటే

చేయి జారి పోతుంటే జీవితాన్ని నిందించకు

కలం వ్రాయలేకుంటే కాగితాన్ని నిందించకు

 

గాలిలోన ఎగిరి పడే గడ్డిపరక ఊపిరెంత

ఏటిలోన తుళ్ళిపడే నీటి బుడగ ఉనికిఎంత

అబ్బో దశ పట్టిందని ఉబ్బిపోతే ఎం లాభం

కడలిలోన మిడిసిపడే కప్ప పిల్ల పాకుడెంత

నడమంత్రపు సిరినేర్పిన దుడుకు బుద్ది దూకుడెంత

 

ఒక్క చినుకు చాలు మట్టి కుప్పను మొలిపించాలంటే

ఒక్క చెనుకు చాలు నవ్వుల చుక్కలు మెరిపించాలంటే

ఊహల్లో గీసుకొన్న యూహాలకు విలువేముంది

ఒక్క మెరుపు చాలు నింగి పక్కను దొరిలించాలంటే

ఒక్క కుదుపు చాలు పుడమి ముక్కను కదిలించాలంటే

 

విజ్ఞానం వికసించదు విదేశాలు తిరిగోస్తేనే

పరిణత మతి ప్రసరించదు పురాణాలు తిరగేస్తేనే

పదునెక్కిన తపన లేక తుది లక్ష్యం అందేది ఎలా..ఎలా..

పరమ నీతి మొలకెత్తదు ప్రమాణాలు చెల్లిస్తేనే..

అసలు లోతు చేజిక్కదు ప్రసంగాలు వల్లిస్తేనే..

 

అలలు ఉప్పొంగే కడలికే ఆటైనా..పోటైనా...

చేవ ఉన్న వృక్షానికే చిగురైనా..చీడైనా....

రాశికి రావాలంటే విశేషమేదో ఉండాలి..

ప్రాణమున్న దేహానికే పడకైనా...నడకైనా..

రచ్చకెక్కు ఆసామికే రాల్లైనా..పూలైనా..

 

ఎంతటి సత్యానికైనా ఏవో కల్లల బాధలు

ఎంతటి దేశానికైనా ఏవో ఎల్లల బాధలు

బాధలు లేనిది ఎవరికి ఏదో ఒక రూపంలో

ఎంతటి శీలానికైనా ఏవో ధూర్తుల బాధలు

ఎంతటి సింహానికైనా ఏవో దోమల బాధలు

 

విధికి నీవు శిరసొగ్గితే విరుగుతుంది వెచ్చని రక్తం

సిరికి నీవు మనసోగ్గితే మరుగుతుంది ఆరని స్వార్ధం

నువ్వు పుట్టిందేందుకో తలను తట్టి తెలుసుకుంటే చాలు

ఉత్త అరుపులోనైనా వొలుకుతుంది చిక్కని అర్ధం

వోల్లకాటిలోనైనా పలుకుతుంది పచ్చని గీతం

 

తాడు బొంగరం లేక క్రీడ ఎలా చూపిస్తావు

నారు లేక నీరు లేక పైరు ఎలా పండిస్తావు

ఈ కబుర్ల టైర్ల గాలి ఎపుడో దిగిపోయిందబ్బో..

పదం లేక స్వరం లేక పాట ఎలా పలికిస్తావు

నిజాయితీకి కట్టుబడక ప్రజలను ఎలా పాలిస్తావు

 

 

                        ----డా. సి. నారాయణ రెడ్డి