అడుగులో అడుగు వేసుకుంటూ.. అందుకోమంది నన్ను ఆకాశం..

అడుగులో అడుగు వేసుకుంటూ..

అందుకోమంది నన్ను ఆకాశం..

తనువంతా తపన నింపుకొని..

సరికొత్త ఎత్తులను చేరుకోమంది నా చైతన్యం.

క్షణ క్షణం కరిగి పోకుండా వడిసి పట్టుకొని.. 

ఆనంద ఝరిలో  తడవమంది నా హృదయం

నడిచి నడిచి పాత బడ్డ దారులు వదిలి..

తల విదిలించి కదిలి సాగమంది నా అవేశం

మూఢనమ్మకాలతో ముడి వేసుకోవటం మాని

మార్పు కోసం పిడికిలి బిగించమంది నా రక్తం

ముందున్న సమస్యలకు లొంగి పోకుండా..

గెలుపు కోసం పోరాడమంది నా వీరత్వం.

ఒడిదుడుకులను ఓటమిగా భావించకుండా..

నిరంతర యుద్ధం చేయమన్నది నా పటుత్వం

అది కాదు ఇది కాదు నా వల్లకాదు మాని..

ఎందుకు కాదు అని కదలమన్నది నా గమనం

అదృష్టం కోసం నలు దిక్కుల చూపులు మాని

నూతన శకానికి నాంది కమ్మంది నా జీవితం..

          -- ప్రభాకర రావు కోటపాటి

                  13 ఆగస్టు 2022