అందుకే ఈ సమాజం నీకోసం ఎదురు చూసేలా నీవు ఎదగాలి

రాళ్ళతో కొడితే పారి పోయెను ఒకడు

ఆ రాళ్ళనే ఏరి దుర్గాన్ని కట్టె నొకడు

రాళ్ళతో కొడితే పారిపోయేవాడు పిరికివాడు

ఎదురు తిరిగే వాడు మొండివాడు

ఆ రాళ్ళనే ఏరి విజయం అనే దుర్గాన్ని కట్టేవాడు నిజమైన నాయకుడు

ఇతరులను దోచుకొని సంపాదించటం రాక్షస తత్వం

తనచుట్టూ గిరిగీసుకొని బ్రతకటం స్వార్ద తత్వం

తనివ్వ గలిగినది పంచుకొని జీవించటం మానవత్వం

సేవా తత్వాన్ని నింపుకొని అందరినీ ఆదుకోవటం దైవత్వం

మానవత్వం దైవత్వం కలిసి ఉండటమే నాయకత్వం

నిద్రలో వచ్చే కలలకు తృప్తి పడేవాడు నిద్ర బోతు

పగటి కలలతో కాలక్షేపం చేసేవాడు సోమరిపోతు

కలలను కర్తవ్యాలుగా మార్చుకొనేవాడు కాల జ్ఞాని

కలలకోసం నిద్రనే త్యాగం చేసేవాడు మార్పు ప్రతినిధి

కర్తవ్యాన్ని మంచి మార్పుకోసం కొనసాగించేవాడు సంఘ సంస్కర్త

నీవు ఉన్నతంగా ఎదగటానికి నీకు ఈ సమాజం కావాలి

నీవు ఎదిగిన తరువాత ఈ సమాజానికి నీవు కావాలి

నీ ముందుతరాలకు నీవు మంచి సమాజాన్ని అందించాలి

నీవు పోయినతరువాత కూడా ఈ సమాజం నిన్ను గుర్తుంచుకోవాలి

అందుకే ఈ సమాజం నీకోసం ఎదురు చూసేలా నీవు ఎదగాలి

 

---- ప్రొ. వంగపల్లి విశ్వనాధం మరియు శ్రీ. సయ్యద్ రఫీ గార్ల ఉపన్యాస స్పూర్తి తో...

చేదు సత్యం మింగ గలిగితే జీవితం వైద్యాలయం..అడుగు తప్పక ఆడ గలిగితే అవనియే నృత్యాలయం

నింగిలోతును చూడ గోరితే నీటి చుక్కను కలుసుకో
రత్నతత్వం చూడ గోరితే రాతి ముక్కను కలుసుకో
అణువు నడిగితే తెలియదా బ్రహ్మాండమంటే ఏమిటో
మౌన శిల్పం చూడగోరితే మంచుగడ్డను కలుసుకో
మనిషి మూలం చూడ గోరితే మట్టిగడ్డను కలుసుకో

సముద్రానికి చమురు పూస్తే జిడ్డు పడుతుందా
హిమనగానికి బొగ్గు పూస్తే నల్లబడుతుందా
తలుపులు కిటికీలు ఎంతగా మూసుకొని ఉన్నా..
తరుముకొచ్చే కాలవాహిని తిరిగిపోతుందా
ముసురుకోచ్చే ముదిమి తన వల విసరకుంటుందా

ఎక్కడో అందనిది ఉందని అపేక్షించకు మిత్రమా
ఎదట ఉన్నది నీది కాదని ఉపేక్షించకు నేత్రమా
చిన్న దీపం మేలుకాదా చీకటింట్లో గడపగా
రాని దానికి అనుక్షణము నిరీక్షించకు హృదయమా
రాయినైనా మాటి మాటికి పరీక్షించకు దైవమా

రాలిపోయే ఆకులను ఎవరాపినా ఏముందిలే
ఊడిపోయే జుట్టును ఎంతగా వత్తినా ఏముందిలే
వప్పకున్నా కొన్ని మార్పులు తప్పవేమో ప్రకృతిలో
కరిగిపోయే మంచునెంతగా కప్పినా ఏముందిలే
కరిగిపోయే వయసునెంతగా దాచినా ఏముందిలే

చేదు సత్యం మింగ గలిగితే జీవితం వైద్యాలయం
మనసుపుటలను చదవ గలిగితే అనుభవం విద్యాలయం
ఎవ్వరో నేర్పాలనే బ్రమ ఎందుకంట వృధా.... వృధా..
అడుగు తప్పక ఆడ గలిగితే అవనియే నృత్యాలయం
కనులు తిప్పక చూడగలిగితే అణువణువు తత్వాలయం

పంటలెన్నో ఇంట ఉన్నా పరిగలేరిస్తుంది లోభం
పెట్టె లోపల గవ్వ ఏదని చెత్త వెతికిస్తుంది లోభం
లోభ తత్త్వం అంతు పట్టదు లోని పొరలను చీల్చకుంటే
ఉన్న కాస్తా కలత నిదురను ఊడ్చిపారేస్తుంది లోభం
మనిషి మనసును కాటి దిబ్బగా మాడ్చి మసి చేస్తుంది లోభం

                                            ----డా. సి. నారాయణ రెడ్డి

నిజాయితీకి కట్టుబడక ప్రజలను ఎలా పాలిస్తావు

చేతకాని తనముంటే జాతకాన్ని నిందించకు

నమ్మలేని సరుకుంటే అమ్మకాన్ని నిందించకు

ఎందుకైనా మేలు లోపమెక్కడుందో తెలుసుకొంటే

చేయి జారి పోతుంటే జీవితాన్ని నిందించకు

కలం వ్రాయలేకుంటే కాగితాన్ని నిందించకు

 

గాలిలోన ఎగిరి పడే గడ్డిపరక ఊపిరెంత

ఏటిలోన తుళ్ళిపడే నీటి బుడగ ఉనికిఎంత

అబ్బో దశ పట్టిందని ఉబ్బిపోతే ఎం లాభం

కడలిలోన మిడిసిపడే కప్ప పిల్ల పాకుడెంత

నడమంత్రపు సిరినేర్పిన దుడుకు బుద్ది దూకుడెంత

 

ఒక్క చినుకు చాలు మట్టి కుప్పను మొలిపించాలంటే

ఒక్క చెనుకు చాలు నవ్వుల చుక్కలు మెరిపించాలంటే

ఊహల్లో గీసుకొన్న యూహాలకు విలువేముంది

ఒక్క మెరుపు చాలు నింగి పక్కను దొరిలించాలంటే

ఒక్క కుదుపు చాలు పుడమి ముక్కను కదిలించాలంటే

 

విజ్ఞానం వికసించదు విదేశాలు తిరిగోస్తేనే

పరిణత మతి ప్రసరించదు పురాణాలు తిరగేస్తేనే

పదునెక్కిన తపన లేక తుది లక్ష్యం అందేది ఎలా..ఎలా..

పరమ నీతి మొలకెత్తదు ప్రమాణాలు చెల్లిస్తేనే..

అసలు లోతు చేజిక్కదు ప్రసంగాలు వల్లిస్తేనే..

 

అలలు ఉప్పొంగే కడలికే ఆటైనా..పోటైనా...

చేవ ఉన్న వృక్షానికే చిగురైనా..చీడైనా....

రాశికి రావాలంటే విశేషమేదో ఉండాలి..

ప్రాణమున్న దేహానికే పడకైనా...నడకైనా..

రచ్చకెక్కు ఆసామికే రాల్లైనా..పూలైనా..

 

ఎంతటి సత్యానికైనా ఏవో కల్లల బాధలు

ఎంతటి దేశానికైనా ఏవో ఎల్లల బాధలు

బాధలు లేనిది ఎవరికి ఏదో ఒక రూపంలో

ఎంతటి శీలానికైనా ఏవో ధూర్తుల బాధలు

ఎంతటి సింహానికైనా ఏవో దోమల బాధలు

 

విధికి నీవు శిరసొగ్గితే విరుగుతుంది వెచ్చని రక్తం

సిరికి నీవు మనసోగ్గితే మరుగుతుంది ఆరని స్వార్ధం

నువ్వు పుట్టిందేందుకో తలను తట్టి తెలుసుకుంటే చాలు

ఉత్త అరుపులోనైనా వొలుకుతుంది చిక్కని అర్ధం

వోల్లకాటిలోనైనా పలుకుతుంది పచ్చని గీతం

 

తాడు బొంగరం లేక క్రీడ ఎలా చూపిస్తావు

నారు లేక నీరు లేక పైరు ఎలా పండిస్తావు

ఈ కబుర్ల టైర్ల గాలి ఎపుడో దిగిపోయిందబ్బో..

పదం లేక స్వరం లేక పాట ఎలా పలికిస్తావు

నిజాయితీకి కట్టుబడక ప్రజలను ఎలా పాలిస్తావు

 

 

                        ----డా. సి. నారాయణ రెడ్డి

 

 

 

 

 

 

 

SWAMY VIVEKANANDA

 

 

నిన్ను పక్కకు లాగే బలహీనతలకు లొంగిపోక సాగించు ఈ జీవితం..

నా మనసేమి చెప్తుందో మీకందరికీ వినిపించాలని ఉంది 

మీకందరికీ చెప్పమని  అది నన్ను ఊపేస్తూ ఉంది..

అందరినీ పిలిచి అరచి చెప్పమంటుంది ..

సభలే పెట్టి విడమర్చి చెప్పమంటుంది...

చెప్పమంటారా ఆ లోతైన నిజం..

వినిపించమంటారా నా విన్నపం..

మళ్ళీ మళ్ళీ వచ్చేది కాదు ఈ  జీవితం..తరిగిపోతుంది మేలుకో ఈ  జీవితం..

చేయాలనుకున్న మంచిపనులు చేసి ఆనందించు ఈ  జీవితం 

నిన్ను పక్కకు లాగే బలహీనతలకు లొంగిపోక సాగించు ఈ జీవితం 

చెప్పాలి చెప్పాలి  అని లబ డబ మంటుంది నా గుండె చప్పుడు.. 

మీకు అర్దమయితే అదే పదివేలు అంటుంది నా పిలుపు..

మనలను ఉసికొలిపే  ఉత్పత్తులు..

మాయలో మనలను ముంచే ప్రలోభాలు..

మన చేత్తో మన కంటినే పొడుచుకొనేటట్లు చేసే అలవాట్లు..

ఇతరులను ముంచి ఎదగాలనే వెర్రి ఆలోచనలు..

బయట పడకపోతే ఎందుకూ పనికిరాదు మన జీవితం..

వినకపోతే విరిగిపోతుంది విలువైన నీ జీవితం..

విషాన్ని వెదజల్లుతున్న విద్వేషాలు..

అంతా మాకే కావాలనే ఆరాటాలు..

పనిచేయకుండా ఫలితాలు ఆశించే దురాశా పాశాలు..

కామంతో కళ్ళు మూసుకుపోయే క్రూరత్వాలు..

చివరకు మిగిలేది ఏమిటో జ్ఞానం లేకపోతే అంతా శూన్యం 

పోయేటప్పుడు ఆలోచిస్తే అనిపిస్తుంది అంతా అయోమయం..

ముందుగా మేలుకొంటే మధురం ఈ జీవితం 

ఏడుస్తూ వచ్చాము...నవ్వుతూ ముగించాలి  ఈ జీవితం..

మనము పోయినా పదికాలాలు గుర్తుండాలి మన జీవితం..

మళ్ళీ మళ్ళీ వచ్చేది కాదు ఈ  జీవితం..తరిగిపోతుంది మేలుకో ఈ  జీవితం..

చేయాలనుకున్న మంచిపనులు చేసి ఆనందించు ఈ  జీవితం 

నిన్ను పక్కకు లాగే బలహీనతలకు లొంగిపోక సాగించు ఈ జీవితం..

కదలి సాగుదాం..కలసి సాధిద్దాం...అద్బుతమైన భారత దేశాన్ని నిర్మిద్దాం..

ప్రపంచాన్ని తన లోతైన ప్రవచనాలతో కదిలించిన కొదమ సింహం..

విద్వేషాలతో విడిపోతున్న జనులకు విశ్వమానవ మతాన్నిపరిచయం చేసిన విజ్ఞాన విహంగం..

మనిషి ఎలా జీవించాలో ఎలా ఆలోచించాలో నిగ్గు తేల్చిన నిప్పు రవ్వ..

బానిసత్వంలో అలసత్వంతో మగ్గుతున్న భారత యువతను స్వాతంత్ర సాధన వైపు నడిపిన స్ఫూర్తి ప్రధాత..

ముప్పైతొమ్మిది సంవత్సరాలు మాత్రమే జీవించి మూడువందల తొంబై సంవత్సరాల సమానమైన సేవ చేసిన మహా నాయకుడు...

ఆయనే..అనన్య అసమాన్యుడు....
ఆయనే..స్వామి వివేకానంద.....

ఆయన పేరు వింటేనే ఆత్మ విశ్వాసం నిద్ర లేస్తుంది..

ఆయన వ్రాసిన అక్షరాలు చదివితేనే సాధించాలనే ఉద్రేకం ఉప్పెనవుతుంది..

ఊహ కందని మేదస్సు అయన సొంతం..
పరిపూర్ణమైన దేశభక్తి అయన ఆసాంతం..

దనానికి దాసుడవ్వలేదు...
మోహాలకు తావివ్వలేదు..
దురలవాట్లకు బానిసవ్వలేదు...

యువశక్తి ఈ దేశాన్ని మారుస్తుంది అని ఎలుగెత్తి చాటిన పరమహంస ప్రియ శిష్యుడు..

శిధిలమవుతున్న భారత సంస్కృతిని తన అమృత వాక్కులతో నిలబెట్టిన ఆరాధ్య పురుషుడు..

అటువంటి స్వామి వివేకానంద మన దేశంలో జన్మించటం మనందరి అదృష్టం..

ఆయన రచనలలో ఎన్నో ప్రశ్నలకు పరిష్కారం..
ఆయన సలహాలలో ఎన్నో సమస్యలకు సమాధానం..

ప్రతి భారతీయుడు తప్పక చదివి పాటించాల్సినవి అయన సూచనలు..
ప్రతి యువకుడు విధిగా నేర్చుకోవాల్సినవి అయన నిర్దేశాలు..

మనము ఆచరించవలసిన జీవన శైలికి...
మన ప్రతి జాతీయ సమస్యకు...
భారతీయ యువత ఔన్నత్యానికి..
విశ్వానికి నాయక గా మన దేశాన్ని నిలపటానికి.. 
కావలసిన నిఘంటువు...స్వామి వివేకానంద.....

ఇకనైనా కళ్ళు తెరుద్దాం..
అయన మనకిచ్చిన అపార విజ్ఞాన సంపదను గుర్తిద్దాం..
ఆ మహానుబావుని కలలు నిజం చేద్దాం...

కదలి సాగుదాం..కలసి సాధిద్దాం...అద్బుతమైన భారత దేశాన్ని నిర్మిద్దాం..

అనుక్షణం నీకు ఆధారమైన ఆ దేవతా స్వరూపాన్ని ఆరాధించు అనుబందముతో ఆత్మీయతతో కృతజ్ఞతతో జీవించు....

జన్మనిచ్చి ప్రేమతో పెంచి పెద్ద చేసిన తల్లి
 
తోడునిచ్చి సేవతో బాద్యత తీసుకొన్న భార్య
 
అండనిచ్చి మాటతో బలాన్ని ఇచ్చిన అక్క
 
చెలిమినిచ్చి ఆటతో ఆనందాన్ని అందించిన చెల్లి
 
ఇన్ని విదాలుగా పురుషునికి ఆధారమైన మహిళను
 
మధించి మత్తులో మునిగి వ్యధకు గురిచేస్తున్న ఓ మగ మృగామా...
ఒక్క క్షణం ఆలోచించు నీవు చేస్తున్నదేమిటో...
 
 
నీ చేతితో నీ కన్నునే పొడుచుకొంటున్నావు...
 
నీవు కూర్చున్న కొమ్మను నీవే నరుక్కొంటున్నావు..
 
సునిశితమైన మనసు, జాలి నిండిన గుండె, మధురమైన పలుకులు, కరుణ కురిసే కళ్ళు, సేవ చేసే చేతులు ...

ఇన్ని కలగలిసిన ఆ మానవతా మూర్తిని ఎలా హింసించాలనిపిస్తుంది మనిషిగా జన్మించిన నీకు..

కన్ను గానని కామంతో...వళ్ళు తెలియని విచ్చలవిడితనముతో...సృహలేని రాక్షసత్వముతో...
నీవు సాగిస్తున్న ఈ దారుణాన్ని ఆపకపోతే....

ఇక సహించబోదు ఈ ప్రపంచం...
భూస్తాపితం చేస్తుంది నిన్ను ఈ సమాజం...

ఇకనైనా కళ్ళు తెరువు...

నీ ఉనికికి కారణమై, నీ చలనానికి చేయూతై, నీ గమనానికి దిక్సూచై,
అనుక్షణం నీకు ఆధారమైన ఆ దేవతా స్వరూపాన్ని ఆరాధించు అనుబందముతో ఆత్మీయతతో కృతజ్ఞతతో జీవించు....